一個可宴客的湯羹做法，主角是瑤柱，所以份量偏多，配新鮮有機粟米，湯清甜濃郁，好好飲。步驟有點多，但跟一煲過全部煲埋一齊，一定有分別啊！
我喜歡一次過浸哂 一斤瑤柱，洗淨，室溫浸發後放雪櫃浸，之後分一部分入冰箱用作熬湯。而另外大半連浸水用來燉，燉到瑤柱夠鬆，再分幾份連湯放入冰箱，隨時用得，味道相當正。
用新鮮粟米，炒完再打特別甜，但切勿打成蓉，湯會變得濁同有渣，一下一下打，2-3下有輕微破開便可。
用燉過嘅瑤柱連精華煮湯，只需後下。免得一早落煲到無哂味，好好飲的，試試!
材料(5碗份量)
乾瑤柱 約15-17粒 (我用北海道瑤柱Small size, 若用大粒，自我調節)
新鮮粟米 1條(大)
金華火腿 3片(先浸熱水10分鐘)
豆腐 1盒(飛水，以減低破爛同出水)
薑 1片
做法:
1. 瑤柱浸發好，連水燉至鬆，約1小時。
2. 豆腐飛水，隔水備用。
3. 粟米搣出粒粒，以薑炒到有甜味，放入攪拌機，打2-3下。粟米心切半，備用。
3. 金華火浸熱水10分鐘，隔水。
4. 爆香薑，下金華火腿炒香，灒入約1.5L水，加入粟米心，打爛粟米同煲出味，約30-40分鐘。取出粟米心。
5. 瑤柱撕幼，連精華一起加入煲約5，6分鐘。
6. 下豆腐，加入生粉水埋芡，有需要下鹽調味。
tips:
1. 可用魚肚代替豆腐。
2. 粟粉水埋芡做羹好易打回原型變稀，生粉相對好一點， 用馬蹄粉埋芡理想。如果一早整定，最好臨上枱先埋芡。
